24th November 2018 News

169
views

Cyclothon-Fuel Conservation Campaign nei in um

Gamsung mun tuomtuom a kibawl bang in CYCLOTHON-Fuel Conservation Campaign zahna Hotel Imphal ah nei in um hi. Tam CYCLOTHON tungtawn a naupang leh khanglai te’n khanletna anei thei nading tup leh ngim ahi hi. Tam vaiguon ahileh Indian Oil Corporation Ltd in asai ahi hi. Chief Guest hina toh uop CAF & PD, Revenue Minister, Shri Karam Shyam ahileh CYCLOTHON Campaign kum khat chin tah toh kisai kipahpina um hi. Shri Uttiya Bhattacharyya, CGM, Indian Oil AOD State Office; Prof.Sinam Rajendra Singh, National Vice-President, Bharat Vikash Parishad leh Shri Sinam Ibungoton Singh, Deputy General Manager(RS) & State Level Coordinator te’n zong vaiguon uop uhi. Minister, Shri Karam Shyam in CYCLOTHON flagged off na nei a, “Joint Hands” CD Indian Oil Channel Partners te a zong hongkhie hi.

Tam cycle rally ah Assembly Road, Thangmeiband Traffic Island leh Khuyathong road chite tuon ua, PWD Office tuon in Kangla Fort ban ah Governor compound lut uhi. Tuaban ah RTS school tuon in Minuthong lei zui in Hotel Imphal tungkia uhi.


 

12th Manipur Polo International 2018 ni 2 na zah in um

Hon’ble Minister, CAF & PD, Revenue, Shri Karam Shyam in 12th Manipur Polo International 2018 ahileh poimaw tah hidan in gen a, Polo tungtawn a khovel in Manipur theipha ahidan zong tahlang hi. Polo khan nading leh sakol kephoi nading a panlah poimaw dan zong gen hi. Chief Guest hina toh 12th Manipur Polo International 2018 vaiguon ni 2 na uop a, Manipur Horse Riding and Polo Association in Mapal Kangjeibung mun a Sangai Festival toh kisai a bawl ahi hi. Manipur a sakol tawm semsem toh kisai Minister Karam Shyam in agenna ah Sagol Kangjei um zel nading in sakol poimaw a, tuazieh in kepbit poimaw chi hi. Veterinary Department leh akisaipi official te’n Polo game um zel thei nading a sakol enkai ding in theisah hi.

Minister, Social Welfare & Cooperation, Smt. Nemcha Kipgen; MLA Shri Heikham Dingo leh Chairman PDA, MLA Shri T Robindro; Chairman MANIREDA Shri Ginsuanhau te’n zong vaiguon uop uhi. USA leh India-A in kimawna masa nei ua, India-B leh England in kimawlna nukhia nei uhi.


 

BJP President Amit Shah vanleng apat kum nalam in kipua

Mizoram campaign neiding a zin BJP President Amit Shah ahileh vanleng akum nalam in kipua masa kha hi. Tlabung village, West Tuipui constituency a siltung hi a, vanleng a pat akum sawm nalam in tual ah kipuo suh kha hi. West Tuipui ahileh Chakma namte hatna hi a, Bharatiya Jananta Party (BJP) in Chakma voter te lungsim lahsawm in vote campaign nei uhi. Mizoram a BJP te’n guolzawna tang thei nading 2 um lah a khat ahi hi. Congress MLA Nihar Kanti Chakma leh Kina Ranjan Chakma te tam constituency ah kitet ding uhi.


 

Nagaland leh Tripura in India Today State of State Survey ah bawlhoi

Nagaland ahileh ‘Law & Order’ lam ah India Today State of State’s Survey 2018 in ‘Best Performing Small State’ award pie uhi. Vice President of India, M Venkaiah Naidu in tam award piehkhietna Minister for Forest, Environment, Climate Change and Parliamentary Affairs, C M Chang kung ah ‘State of the States Conclave 2018’ zahna India Today Group in Taj Hotel, New Delhi mun a saina ah nei hi. Alangkhat ah Tripura government in India Today State of the States Conclave 2018 ah award 3 sang uhi. Tripura ahileh most improved small state award pieh in um hi. Chief Minister Biplab Kumar Deb khel in Special Resident Commissioner of Tripura Bhavan at New Delhi, Somya Gupta in Vice President of India, M Venkaiah Naidu apat ana sang hi. Tam vaiguon Chief Ministers of Assam, Tamil Nadu, Puduchery, Gujarat ban ah India Today editor Raj Chengappa te’n zong uop uhi.


 

Sangai Festival ni 3 ni zahna um

Minister, Works & Power and IPR, Shri Th Biswajit leh Minister CAF & PD, Revenue, Shri Karam Shyam te’n Sangai Festival 2018 ni 3 ni zahna Bheigyachandra Open Air Theatre, Palace Compund ah uop uhi. Tam hun in nam la tuomtuom sahna um a, Pena genna Folk Ensemble Manipur, Assamese dance leh traditional dance Maibi Leiching Jagoi tel in chi tuomtuom pulah in um hi. Minister Karam Shyam in Indian Oil Corporation Limited stall hongkhietna Hapta Kangjeibung Hapta Kangjeibung ah nei hi. IOCL stall bawl etkhietna zong nei a, ICICI Bank stall neitu toh loan thu kihouna zong nei hi.


 

Horticulture Minister Shyamkumar in Senapati Vakho village ah rural market hongkhie

Senapati Headquarters, November 23, 2018 (DIPR): Horticulture and Soil Conservation Minister Shri Thounaojam Shyamkumar in tuni’n Mission for Integrated Development of Horticulture (MIDH) scheme nuoi a Rs 13.75 lakh bei a kibawl rural market shed honkhietna Vakho village, Senapati district ah nei hi.

Chief guest hina toh uop Minister Th. Shyamkumar in Vakho village community hall a agenna ah lou a piengkhie haichi tha te ahileh kho sung bazae buh a zua khiet thei hipaipai tading chi hi. Tam bazar buh tungtawn a loubawl mite nehsuina nawpzawh ding gingtat thu gen hi. Horticulture and Soil Conservation Department in singtang leh phaizang khantouna kibang um nading in panla a, mun lemzaw a zong market shed bawl touzel ding hidan in gen hi. Kho mipite ading in badminton court khat zong siemsah ding in gen a, sports ahileh ihin na khat uh ahi chi hi.

Shri Anthony, Director NEC, Government of India, N. Premananda Singh, Mission Director, Horticulture and Soil Conservation Department, Sukhdev Hamom, District Officer Senapati, Horticulture and Soil Conservation Department, Ng. Kulachandra Singh, SDO Senapati, leh Vakho mipite’n uop uhi.


 

Manipur State Commission for Women lamkai te’n Governor kimupi

Manipur State Commission for Women Chairperson Prof. (Dr.) Meinam Binota lamkai in Manipur Governor Najma Heptulla kimupina nei uhi. Manipur State Commission for Women palai te’n Governor Heptulla kung ah state sung a numeite bitna toh kisai genkhawm uhi. Guru Nanak Jayanti toh kisai in zong Governor nu’n kituohna leh lemna Guru deibang bawl ding in gen hi. Governor Heptulla in zong Shantikumar Sharma, Ex-President, BJP Manipur Pradesh kimupi in singtang gam a quality education um thei nading kihouna nei uhi.


 

Meltheilou te’n buphai kikoi khawm mei in hal

Bu vel ding a buphai kikhawl khawm sa meltheilou te’n mei in ana hal uhi. IRE School toh kinai Wangjing, Thoubal Police station a kikoi buphai ahileh zinglam bai tah in meltheilou te’n ana hal uhi. Lou neitu ahileh Laishram Mani Singh (55) son of late Ibomcha of Wangjing Sk Leikai hi a, machine zang a vel ding buphaite ahileh kaikhawm masah ngai hi.

zingkal matah a thou te’n nai 3.30 lah in tam siltung mu uhi. Mani zi Ranjana in melma tam bang a gamta ding neilou hidan in gen a, lamdang sah thu tahlang hi. Mipi te’n phelmit sawm in panla ua, tualeh fire tender te han nan uleh atam zaw kang tum man hi. Police team te’n zong amun delpai ua, zan kim lah a kihal hiding in gingtat thu gen uhi. Tualeh metre 50 vel ah plastic bawm mu ua, mei hal nading tawina hiding gingtat thu gen uhi. Case gellut in suizuina um lel hi.


 

SHARE