Manipur Sangai Festival 2018 khah hita

49
views
sangai_festival_2018_closing

Ni 10 sung zah a um Manipur Sangai Festival, 2018 khahna tuni’n Bhagyachandra Open Air Theatre (BOAT) ah nei in um hi.State Government in tourism sector khansah nading a vaiguon sai khahna ahileh Governor Dr. Najma Heptulla leh Chief Minister Shri N. Biren Singh te’n zinlian hina toh uop uhi.


Tam hun in Dr. Heptulla in khovel a khan hat pen tourism sector hidan in gen a, gam tamtah resources hoi neilou te’n tourism habawl in economic khangsah thei hidan in zong tahlang hi. Governor nu’n genbe na ah tourist te’n apoimaw ahileh five star hotel hilou a, asiengthou leh poimawte um, ban ah mantawm hidan in gen hi. State Government in hotel-te enkai zel in siengthouna leh standard hoitah zui dan enchien ding in theisah hi. Tualeh paying guest system Manipur in zui poimaw a, private building tamtah in chitna nei ua, hinanleh building neite training pieh ngai hi’n gen hi. Tualeh mipite’n Manipur sienthou nading a panla ding in theisah a, adieh in lampi leh kikhop khawmna munte siengsah ding in theisah hi. Hill district a mun tamtah ahileh hill station a siemthei hidan in zong Dr. Heptulla in gen hi.

Shri N. Biren Singh in tam festival hun in hill leh valley district mipite’n kithuopina kibang Government pie hidan in gen a, tualeh Manipur Cherry Blossom cum Flower Festival, Mao, Senapati District mun a kizang zong Manipur Sangai Festival dan a zah hita chi hi. Princess of Thailand leh US Ambassador to India te’n zong akhatveina ding in vaiguon uop ua, Sumo wrestling zong akhat veina ding in North East gamkai ah nei in um hi. Tuaban ah Shri N. Biren Singh in Princess of Thailand zong Kangla Museum sung a sillui umte mu in kipah hi’n gen hi. Thai Princess visit ahileh lawching hi’n gen a, State sung a nasep khawmding lunggul hi’n tahlang hi.

Manipur Mountaineering and Trekking Association (MMTA) apat trekker khenkhat Dzuko zuan a kalsuon Nagaland Police te’n ana matna toh kisai in Chief Minister pa’n Nagaland Chief Minister Shri Neiphiu Rio kihoupi ahidan gen hi. Public Health Engineering Minister Shri Losii Dikho ahileh Kohima ah sawl in um a, akisaipi State thunei tute toh kihouna nei in buoina ahileh suhveng hita a, mat a umte hakhiet pai hiding chi hi.
Deputy Chief Minister Shri Y. Joykumar, Manipur Legislative Assembly Deputy Speaker Shri K. Robindro, Ministers, MLAs, high ranking civil, police lejh military officer ban ah mipi tamtah te’n vaiguon uop uhi.

SHARE