Mizoram Assembly Election vote simna umding

94
views
mizoram_election

Mizoram Assembly election nei a na um toh kisai vote simna ahileh tuni November 11, zinglam nai 8 apat umding a, security hoitah zong guonggal jou hita chi’n state Chief Electoral Officer (CEO) Ashish Kundra in gen hi. Election ahileh apeisa November 28 in nei ana hi a, Congress lamkai Chief Minister Lal Thanhawla in a 3 vei nading vai ahawm ding leh hawm lou ding tam result phuonkhiet jou ahichieng in kithei tading hi.

Mizoram ahileh northeast a Congress hatna umsun hita a, vote simna ahileh district headquarter 8 a counting centre 13 ah nei hiding hi’n Kundra in genbe hi. DIG (Northern Range) Lalbiakthanga Khiangte in tam vote sim nading toh kisai a three-layer security siem a um ahidan zong ana gen ngai a, Central Armed Police Force (CAPF) company 8 zah ahiban ah state armed police leh unarmed police personnel te’n zong venbitna peding uhi.

2013 elections lai in Congress in seat 34 ana mu ua, opposition Mizo National Front (MNF) in 5 leh Mizoram People’s Conference in seat 1 ana tang uhi. Congress leh MNF in Mizoram ah 1987 lai apat vai ana hawm ta uhi. Tutung BJP in zong mitsuon in nei a, bangtan atung jou ding uai chi ahileh mipite bildawna pen ahita hi. Mizoram full-fledged state ahinua 1987 lai apat in party koima 3 vei kizom a vaihawm jou ana um nailou a, tutung in tam thu adih kia ding leh dihlou ding thei hita ding hi. Congress leh MNF in candidate 40 tuoh nei ua, BJP in seat 39 ah candidate nei uhi. Zoram Peoples Movement (ZPM) in zong seat 35 ah candidate nei uhi.

SHARE