ECI in Senior Officer 4 Accessibility Observer ding in guot

83
views
Manipur Election

Innsuon ah ‘Voter Guide’ hawm hiding: CEO

Election Commission of India in State Government apat senior officer 4 ahileh Accessibility Observers ding in guot a, Polling station jousie zah dan leh Persons with Disabilities te’n nop tah a vote khiet thei nading ngaisut ding uhi. Tam officer te ahileh Shri JC Ramthanga, IAS, Shri M. Lakshmikumar, IAS, Shri Th Gopen Meetei, IAS leh Shri Gyan Prakash, IAS hi uhi. CEO office in akhat vei nading in ‘Voter Guide’ Electoral Roll a min khum te innsuon ah Booth Level Officers tungtawn in hawmkhe ding uhi.

Conference Hall CEO, Lamphelpat, Chief Electoral Officer, Manipur mun a Shri PK Singh in voter 19,59,429 te’n 17th Lok Sabha Election – 2019 chieng in Vote khietna neiding ahidan tahlang hi. Tuate lah ah pasal 9,43,426 leh numei 995773 um a, Third Gender voter 45 zong um hi. Polling stations 2,862 ahileh mun 2,275 ah um a, 283 ahileh Critical (227 Outer leh 56 Inner) ban ah 225 Vulnerable (171 Outer leh 54 Inner). P-2 Polling stations ahileh 200 um a, P-3 ahileh 26 um hi. Polling Party te ahileh election masang ni 2 ahilouleh ni 3 in polling station chiet ah tung ding uhi.

CEO Manipur

Polling stations ading toh kisai in CEO office in MSPDCL kung ah 1,217 polling station a electricity connection bawl nading fund peta hi’n gen hi. Akisaipi Deputy Commissioners in polling station 665 a Ramps umlou te bawl ding ua, Department of Education in School building a Ramp te siem ding chi hi. Tualeh polling station chin a tui dawn ding kining ching koi nading fund DC te kung ah hakhiet hita hi.

CEO office in 8×4 feet flex printed Signage ahileh sia frame bawl in tungding ding ua, ECI in polling station siem ding dan toh kisai agente tahdoh ding uhi. DC kung ah 346 polling station a furniture zah ding hire man ding fund hakhiet hita a, toilet umlou 236 polling stations zong bawl ding uhi. Commission thupieh dungzui in State election machinery ahileh PwD te zah ding zong pieh hiding a, PwD 7,699 ahileh vote khe thei ding in um a, gari 5 siem sah hiding hi. Central Armed Police Force (CAPF) 90 Coys ahileh Outer Manipur Parliamentary Constituency election hun in zah hiding a, tuate lah ah State apat 15 Coys IRB telpha a, Central forces lah ah CRPF, BSF, SAP ban ah Assam leh Mizoram ban leh RPF zong tel hi.

Helicopters 3 ahileh election jou chia 124 polling party, EVM leh VVPAT tuokhiet nading Tamenglong (49), Churachandpur (39), Chandel (20) leh Ukhrul (16) ah siem in um hi.

Imphal East leh Churachandpur district a assembly constituency khat tuoh ahileh Women poll personnel te’n enkai ding ua, India sung a zong amasa pen hilai ding in kigen hi. Assembly segment khat chiet a model polling station khat siem hiding hi. Online live webcasting ahileh 1250 polling station ah bawl hiding hi.

CEO in Print & Electronic media te’n PCI guideline zui a nasem ding leh Guidelines for Election Broadcasts NBSA in asuo khiet zui ding in theisah hi. Tam hun Additional CEO, Shri T. Ranjit Singh, Joint CEO Shri Ramananda Nongmeikapam leh CEO office official te’n uop uhi.

SHARE