Sum demand bawl a minthang Nando JNIMS Hospital apat taimang

115
views
nando

Lungnila Elizabeth murder case toh kisai a mat a um ban ah Sajiwa Central Jail, Imphal a kum 16 val Under Trial Prisoner (UTP) JNIMS Hospital Ortho ward apat zingmawng lam in ana taimang hi. Thokchom Nando Singh @ Nanao (34 yrs) son of Th. Subol Singh of Khangabok Part –III um na thei um leh Police in cash reward Rs. 1 Lakh chiem uhi.

2003 lai in mat ana hi a, ama ahileh November 4, 2003 lai a naupang kum 8 khat school  gate (Little Flower School) a man in ana that hi. Minister lui Francis Ngajokpa tanu kum 8 pha pan Lungnila Elizabeth shiluong Tera Sadokpam, Imphal West a mukhiet ahi apat tuni tan mittui pawt a um zing um nalai hi.

 

Th. Nando ahileh Ortho Ward ah Spinal cord natna toh kisai kizen ding in November 26, 2018 apat ana um hi. February 8, 2019 in surgery ana nei hi. Apa Th. Subol Singh a enkol thei ding in phalna pieh hi a, Yaoshang masang deu in demand letter 10 leh mobile phone 2 ban ah Sim card ama pat mukhiet in ana um hi. Alupna hoi tah a suizui ahina pat mukhiet hi a, tuazieh in a enkol a pa Subol zong mat in um a, jail ah koi uhi. Tam thu zah tah in DGP of Manipur L M Khaute telna in hospital mun delpai in enkhie ua, tam thu toh kisai bangma genkhiet nei naikei nan uleh case gellut in um hi.

Nando taikhiet ahileh ama tung a hamkamsuo nei kha jousie ading in zauhuoi pha a, gangster lah a zauhuoi pen a kigen pawl ahizieh leh Sajiwa jail sung kum 16 a um nasan a demand letter pethei khat ahizieh in zau huoi dieh hi.

June 2009 lai in contractor Krishnadas kithana toh kisai in thudohna nei ana hi a, 2010 July in zong sum demand na tuomtuom zieh in thudoh ana hikia a, tualeh 2012 in AMWJU President A Mobi tenna inn ah grenade ana pawh sah hi.  Businessmen lian tahtah ading a mi zau huoi pen ahi hi.

SHARE