Lamka mi tamtah tuonna Tourist Bus Kangpokpi nai ah tuohsie, mi khat shi, 15 liem

91
views

Tourist bus khat Kangpokpi District Headquarters nai lah a tuohsiet tuoh zieh in naupang pasal kum 14 khat in shina tuoh a, Japanese lawmta khat tel in midang 15 in zong liemna tuoh uhi. Airbus bearing No. MN01-1944 ahileh Dimapur apat Imphal zuan a tai hi a, passenger 20 te van adim tah in puo hi. Hinanleh Changoubung village leh kangpokpi DHQs kikal National Highway – 2 a kawl 50 metre ah lengkhe kha hi.

Shina tuoh ahileh Ningthoujam Momocha, son of Kumar (accident hun a bus heh) Khangabok, Thoubal hi a, amun ah shipai hi. Imphal khopi zinding kuon Japanese lawmta khat tel in midang 15 ten liemna tuoh ua, khat le ni liemna tuohlou zong um uhi. District Hospital Kangpokpi mun a Japanese khanglai Futa Matsui (Passport leh Visa tungtawn a thei) in agendan in numei nu ahileh a nungahnu Kanako Ikai hi a, Ima Keithel pha a shopping bawlding leh vai dangdang nei hi’n gen a, tam accident ahileh tha khat seng zieh in bangma thei manlou chi hi.

Liemna tuoh dangte ahileh Stalone Aimol of Ngairong, Tengnoupal District; S. Khamting Aimol of Aimol Satu village, Tengnoupal Dist; Dilbung Renghong Lamkang of Angkhelchayeng, Chandel Dist.; Thanglenmang Baite of Hengkeng, Ccpur; Kaikhohao Baite of Leisanbung, Ccpur; Ngamkhogin Baite of B Phaicham, Ccpur; Thangdoumang Baite of B Phaicham, Ccpur; Ngami of Ukhrul; Ningam Haoshinwun, Ukhrul; Dearboy Mashangve, Ukhrul; Ramngachan Mahukva, Ukhrul; Kumar of Khangabok Thoubal (Bus Driver) leh Seiboigin Vaiphei of Motbung, Kpi Dist hi uhi.

Tam mun ah gari tuohse nuom mama hi’n kigen a, akisaipi thunei tute’n ‘Accident Prone Area’ khat a puon ding leh lam ning dalna ban ah signboard chite tah ding in hoi mama hi.
Dr. Rangitabali Waikhom, IAS, Deputy Commissioner, Kangpokpi leh SDC (HQ), Kaigoulal Kipgen, MCS te’n amun delpai in sil umdan enchien ua, sil umdan hoitah a theichien nuom DC nu ahileh kawl a kum suh nalam in akhup liem hi. District Administration ban ah Kangpokpi Police, Kangpokpi Town Committee, Kangpokpi Women Welfare Organization leh Kangpokpi Youth Union te’n zong liemna tuohte kung ah nehding ann, singpi leh nehthei chite ban ah avante uh bit tah a muthei nading in panla uhi.

SHARE