Expert te’n ganta kithana toh kisai mihing hiding in ngaw, teeth mark…..

527
views
human_or_beast

Manipur sung mun tuomtuom a ganta kithana toh kisai suizuina nei Wildlife expert te’n Churachandpur leh Kangpokpi lah a siltung gamsa hilou in mihing hizaw ding in gen uhi. Hinanleh phaizang gam a siltung toh kisai suizuina nei nalai uhi. Wildlife Institute of India (WII) apat expert team-te ahileh Imphal ah ki camp in tam siltung toh kisai suizuina nei uhi.

Churachandpur, Chiengkawnpang apat October 27 a kipan tam buoina ahileh state veterinary department in zong suizuina ana nei in gamsa ha hiem nei te’n atha hiding in ana gen uhi. Hinanleh Wildlife Institute of India scientist te’n ha lim (teeth mark) mu ahilou zieh in gamsa hilou in mihing gamtatna hizaw ding in gen uhi. Tualeh Kangpokpi district a bawng kine leh aki (horn) kilakhie zong gamsa neh hilou in mihing gamtatna hizaw ding in gen uhi.

Chief conservator of forest (CCF) Anurag Vajpayee in Churachandpur leh Kangpokpi district a siltung khenkhat police in enkai zaw ding hidan in gen hi. Wildlife forensic expert team te’n phaizang a siltung toh kisai genna ah kum peisa Odisha a siltung bang hiding a gingmawna nei a, hinanleh Manipur ah ngieh (wolves) mu hilou chi’n Vajpayee in gen hi. Hinanleh Nagaland ah Wolf dogs mu hi a, Manipur ah kimu ngailou behbeh lou hi. Tam gamtatna si-al (jackal) ahilouleh ui ahi ei chite enchien ua, leopard cat ahilouleh jungle cat chite toh kisai zong suizuina nei uhi.

SHARE